Matabaan,(insidesomalia.org)-, Warar Xog-ogaal ah oo ka soo baxaya Degmada Matabaan ee Gobalka Hiiraan ayaa sheegaya in Dagaal culus oo laysku weydaarsanayo hubka noocyadiisa kala duwan ku dhaxmarayo Xoogagga Maxkamadaha Islaamiga iyo Ciidamo Itoobiyaan ah oo ka soo dhaqaaqay dhinaca Degmada Guri-ceel ee Gobalka Gal-gaduud.

Wararku waxaa ay intaa ku darayaan in Dagaalka hadda ka socda daafaha Degmada Matabaan in uu u dhaxeeyo Ciidamo ka tirsan Maxkamadaha oo ka yimid Degmada Guri-ceel halka kuwo kale oo ka tirsan isla Maxkamadaha kana tagay Magaalada Beledweyne ku sugan yihiin halka lagu magacaabo (Qabno) oo ay dhigeen ciidamo difaac ah.

Dad rayid ah oo ku sugan Degmada Matabaan oo ay la hadashay HOL ayaa sheegay in ay gudaha Degmada ku soo dhaceen dhowr madfac isla markaana dadka shacabka ah bilaabeen in ay isaga caraaraan guryadooda si markaa ay uga fogaadaan waxyeelo ka dhalata hubka dhinacyadu is-weydaarsanayaan.

Dhaq-dhaqaaqa Milatari iyo dagaallada laga soo sheegayo qeybo ka mid ah Gobalka Hiiraan ayaa walaac iyo shakiba ku abuuray dadka ku dhaqan Magaalada Beledweyne oo ka cabsi qaba in ugu danbeytii dagaalku ku soo fido deegaanada ku dhaw dhaw Magaalada, maadaama Ciidamada Itoobiyaanka ah doonayaan in ay soo gaaraan fariisinkoodii hore ee Jante-kuundisho oo hadda xarun u ah Xoogagga Makamadaha.